तिहारका तीन दिन मुलुकभर लोडसेडिङ नहुने

काठमाडौ, कार्तिक २७ – सरकारले उज्यालो चाड तिहारको तीन दिन मुलुकभर लोडसेडिङ नगर्ने भएको छ । विद्युत् प्राधिकरणले बडादसैंमा जस्तै तिहार पर्वका प्रमुख तीन दिन लक्ष्मी पूजा, गोवर्धन पूजा/म्हः पूजा र भाइटीकाको दिन लोडसेडिङ नगरिने जानकारी ऊर्जा मन्त्रालयका सचिव हरिराम कोइरालाले दिए ।

उनका अनुसार कुलेखानी जलाशयबाट सञ्चालन हुने दुवै आयोजनाबाट विद्युत् उत्पादन गरी तिहारको तीन दिन मंगलबार, बुधबार र बिहीबार मुलुकभर चौबीसै घन्टा बिजुली दिइनेछ । दिनको दुई पटक गरी ६ घन्टा लोडसेडिङको मार खेपिरहेका उपभोक्ताले तिहारको तीन दिन भने चौबीसै घन्टा बिजुली बाल्न पाउने छन् ।

कुलेखानी मुलुकमा विद्युत्को चरम अभाव हुने समयमा बिजुली उत्पादन गरी लोडसेडिङ कम गर्ने आयोजना हो । उज्यालो पर्वमा उपभोक्तालाई अँध्यारामा बस्नु नपरोस् भनेर तिहारमा कुलेखानी आयोजना चलाएर मुलुकलाई लोडसेडिङमुक्त गर्न लागिएको हो ।

कोइरालाले ६० मेगावाटको कुलेखानी पहिलो र ३२ मेगावाटको कुलेखानी दोस्रो जलाशययुक्त आयोजना चौबीसै घन्टा चलाएर भने पनि तिहार पर्वका महत्त्वपूर्ण तीन दिन मुलुकभर लोडसेडिङ नगरिने बताए ।

‘यस वर्ष कुलेखानीको जलाशय इन्द्र सरोवर भरिनुका साथै सिमेन्टका बोराले छेकी थप ४० सेन्टिमिटर पानी जम्मा गरिएको छ । कुलेखानीका दुवै आयोजना चलाएर तिहारका बेला तीन दिन लोडसेडिङ गरिने छैन । उज्यालो पर्व तिहारमा उपभोक्ताहरू अँध्यारामा बस्नुपर्ने छैन,’ उनले कान्तिपुरसित भने ।

ऊर्जा मन्त्रालय र विद्युत् प्राधिकरणका अधिकारीले आइतबार छलफल गरी तिहारको तीन दिन लोडसेडिङ नगर्ने कार्ययोजना बनाएका हुन् । हाल मुलुकमा विद्युत्को माग १ हजार मेगावाट छ । तिहारका बेला उद्योगधन्दा र कार्यालय बन्द हुने भएकाले विद्युत् खपत ३० प्रतिशत अर्थात् ३ सय मेगावाटले घट्छ ।

तिहारमा लोडसेडिङ नगर्न सात सय मेगावाट बिजुली आवश्यक पर्छ । कुलेखानीसहित मुलुकका सबै आयोजनाबाट ६ सय मेगावाटको हाराहारीमा विद्युत् उत्पादन हुन्छ र भारतबाट १ सय मेगावाट आयात गरिँदै आएको छ । कुलेखानी चलाउँदा मुलुकमा सात सय मेगावाट विद्युत् उपलब्ध हुने भएकाले तिहारका तीन दिन मुलुकलाई लोडसेडिङमुक्त राख्न सकिने जानकारी प्राधिकरणका एक अधिकारीले दिए । तिहार सकिएको भोलिपल्ट शुक्रबारदेखि पुनः दुई पटक गरी ६ घन्टा लोडसेडिङ गरिने जानकारी ती अधिकारीले दिए ।
प्रकाशित मिति: २०६९ कार्तिक २७ १२:३६

Source : http://www.ekantipur.com/nep/2069/7/27/full-story/357357.html

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s